मकावनपुरको कुलेखानी आयोजनाको जलाशय भरियो

मकवानपुर,कात्तिक २२ । 

मकवानपुरको कुलेखानी जलपिद्युत आयोजनाको जलाशय इन्द्र सरोवर भरिएको छ । नेपाल विद्युत प्राधिकरणले दसैँ अघिबाटै कुलेखानी आयोजनाबाट विद्युत उत्पादनमा कटौती गर्दै आएको थियो । विद्युत उत्पादनमा जलाशयको पानी प्रयोगमा नल्याएपछि कात्तिम महिनामा जलाशय भरिएको हो । सरोबर क्षमताअनुसार भरिएकोले लोडसेडिङ कम गर्न सहयोग पुग्ने अनुमान गरिएको छ । 

जलाशय भरिएकोले बालुवा भरेर बोरा राखी थप केही पानी संकलन गर्ने तयारीमा रहेको आयोजनाले जनाएको छ ।  आयोजनाको जलाशयमा समुन्द्री सतहबाट एक हजार पाँचसय ३० मिटर उचाईसम्म पानी संकलन गर्न सकिन्छ । कुलेखानी जलाशयमा सोमबार मध्यान्हसम्ममा समुन्द्री सतहबाट एक हजार ५सय २९ दशमलव ९१ मिटर पानी संकलन भएको छ । अहिले पानी पर्ने क्रम रोकिएपनि जलाधार क्षेत्रका खोलाबाट पानी आउने क्रम रोकिएको छैन । सरोवर पूर्ण क्षमतामा भरिएमा यस वर्ष लोडसेडिङलाई दैनिक १८ घन्टाबाट घटाउन सकिने अपेक्षा गरिएको छ ।