सिन्धुलीमा पानीको महसुल नतिर्ने उपभोक्ताहरुको नामावली सार्वजनिक

२५ भदौ,लोकहरि आचार्य,सिन्धुली

सिद्धेश्वर खानेपानी तथा सरसफाई उपभोक्ता संस्था सिन्धुलीले पानीको महसुल नतिर्ने उपभोक्ताहरुको नामावली आज सार्वजनिक गरेको छ । संस्थाले आज सिन्धुलीमाढीमा पत्रकार सम्मेलन गरि २ हजार भन्दा माथि महसुल नतिर्ने उपभोक्ताहरुको नाम सार्वजनिक गरेको हो । संस्थाका १ हजार ६ सय ६८ व्यक्तिगत र ४४ संस्थ्ाागत सदस्य रहेका छन् ।

 पानीको महसुल नतिर्नेमा सरकारी कार्यालयहरु समेत परेका छन् । केही सरकारी कार्यालयहरुले संस्थालाई महसुल बुझाए पनि कुनै सरकारी कार्यालयहरुले भने महसुल नबुझाउने गरेको संस्थाका अध्यक्ष डम्वरबहादुर खड्काले बताउनु भयो । संस्था द्धारा जारी गरिएको विज्ञप्तीमा २ लाख ३३ हजार ५ सय ७४ रुपैयाँ महसुल उठ्न बाँकी रहेको जनाएको छ । साथै ९ करोड ९२ लाख ८५ हजार ६ सय ४६ रुपैयाँको लागतमा निर्माण सम्पन्न खानेपानी योजना अहिले सम्म पनि निर्माण कम्पनी चितवन कोइ महादेव खिम्तीले हाल सम्म पनि ठेक्का नबुझाएको बताइएको छ ।

 कतिपय सर्वे स्टमेट गलत भएकाले निर्माणमा अनावश्यक खर्च भएको संस्थाले बताएको छ । कतिपय उपभोक्ताहरुले धारामा पानी नआएकाले महसुल पनि नतिरेको उपभोक्ताहरुले बताएका छन् । आफ्नो धारामा पानी नै नआउने गुनासो गर्दा पनि संस्थाले चासो नदिएकाले आफूहरुले पनि पानीको महसुल नतिरेको उपभोक्ताहरुको गुनासो रहेको छ ।