एमाले सभासद्हरुलाई निर्देशन

काठमाण्डौ,वैशाख २९ ।

नेकपा एमालेका अध्यक्ष झलनाथ खनालले सङ्घीयता र शासकीय स्वरुपलगायतका संविधान निर्माणका विषयमा पार्टीको निर्णयअनुसार मत जाहेर गर्न आफ्ना सभासद्लाई निर्देशन दिनुभएको छ । विभिन्न पार्टीका जनजाति र मधेसी सभासद्ले संयुक्त मोर्चा बनाउने तयारी गरिरहेका बेला आज बसेको एमाले संसदीय दलको बैठकमा अध्यक्ष खनालले यस्तो निर्देशन दिनुभएको हो । उहाँले दलहरुको शीर्ष तहमा सहमति वा लेनदेनबाट कुनै सहमति भएमा सोही बमोजिम हुने तर मतदान गर्नु परेमा पार्टीको स्थायी कमिटीको पछिल्लो निर्णय अनुसार प्रस्तुत हुन आग्रह गर्नुभयो । 

अध्यक्ष खनालले सहमतिका लागि ११ र मतदान भएमा ६ प्रदेशको पक्षमा रहेको पनि बताउनुभएको बैठकमा सहभागी सभासद् विना ज्ञवालीले जानकारी दिनुभयो । त्यसैगरी, एमालेले शासकीय स्वरुपमा लागि संसद्बाट निर्वाचित कार्यकारी प्रधानमन्त्री र निर्वाचन मण्डलबाट निर्वाचित राष्ट्रपतिका पक्षमा मत जाहेर गर्ने भएको ज्ञवालीले बताउनुभयो । तर पासाङ शेर्पा, थममाया थापा, किरण गुरुङलगायतका जनजाति सभासद्हरुले प्रदेशका विषयमा थप छलफल गर्न माग गर्नुभएको थियो ।