बस दुर्घटनापछि तनावमा बनेपा

काभ्रे, असार ३० । काभ्रेमा बसको ठक्करबाट पैदल यात्रुको मृत्यु भएपछि बनेपा तनावग्रस्त भएको छ । आज विहान बनेपाको बुडोलबाट बसपार्क आउँदै गरेको ना २ ख ५८९२ नम्वरको बसले जिल्ला शिक्षा कार्यालयका श्रोत ब्यक्ति डेगराज भट्टराईलाई ठक्कर दिंदा उनको घटनास्थलमै मृत्यु भएको प्रहरीले जनाएको छ । भट्टराई साथीहरुका साथ मर्निङ्ग वाकमा निस्किएका थिए । बसको ठक्करबाट अन्य २ जना गम्भीर घाईते भएका छन् । घाईते हुनेमा श्रोत ब्यक्ति नवराज तिमल्सिना र रामशरण बजगाई हुन् । तिमल्सिनाको अवस्था गम्भीर छ । भट्टराईको मृत्यु भएपछि आफन्त र स्थानीयले क्षतिपूर्ति र कारबाहीको माग गर्दै सडक अबरोध गरेका थिए । दुर्घटनाका कारण बनेपा तनावग्रस्त बनेपछि स्थितिलाई नियन्त्रणमा लिन प्रहरीले ७ सेल अश्रुंग्याँस प्रहार गरेको छ ।

बुडोलमा बास बसेको सो बस न्युटलमा सह–चालकले चलाउँदै गरेको अवस्थामा नियन्त्रण बाहिरगई पैदल यात्रुलाई किचेको इलाका प्रहरी कार्यालय बनेपाका प्रहरी निरीक्षक खेम आचार्यले जानकारी दिनुभयो । स्थानीयहरुले बसमा आगो लगाए पछि स्थानीय र प्रहरीवीच झडप भएको हो । झडपका क्रममा केहि प्रहरीलाई  स्थानीयले ढुंगा प्रहार गरी घाइते बनाएका छन् । प्रहरी माथिनै स्थानीयले आक्रमण गरेपछि अश्रुग्याँस प्रहार गरेको प्रहरी भनाई छ । अरनिको राजमार्गको बुडोल सडक खण्डमा तनावग्रस्त हुँदा यातायात समेत प्रभावित भएको छ । सोहि राजमार्ग भएर चल्ने दोलखा, सिन्धुपाल्चोक, रामेछाप र सिन्धुली जाने कुनैपनि सवारी साधन चल्न सकेका छैनन् ।