सविंधानसभाको म्याद ६ महिना थप

काठमाण्डौ,मसिंर १३

दलहरुबीच संविधानसभाको म्याद ६ महिना थप्ने सहमति भएको छ । प्रमुख तीनदल र मधेसी मोर्चाको आज बिहान बसेको बैठकले संविधानसभाको म्याद ६ महिना थप्ने निर्णय सहित ६ बुदे सहमति गरेको हो । ४ सदस्यीय कार्यदलले तयार पारेको कार्यतालिका अनुमोदन गर्दै दलहरुले मंसिर अन्त्यसम्म शान्ति प्रक्रिया टुङ्गो लगाउने सहमति गरेका छन् । बैठकमा दलहरुबीच भएको सातबुदे सहमति जस्ताकोत्यस्तै कार्यान्वयनमा लैजाने सहमति पनि भएको छ ।

 बैठकपछि नेपाली कांग्रेसका उपसभापति रामचन्द्र पौडेलले संविधान निर्माणको कार्यतालिका संवैधानिक समितिलाई बनाउन जिम्मा दिने र दलहरुबीचमा निरन्तर छलफल गरेर सातबुदे सहमति कार्यान्वयन गर्ने सहमति भएको जानकारी दिनुभयो । सर्वोच्च अदालतको फैसलालाई मध्यनजर गरेर संविधानसभाको म्याद ६ महिना थप्ने सहमति भएको माओवादी सचिव पोष्टबहादुर वोगटीले जानकारी दिनुभयो । 

दलहरुको सहमति अनुसार आजै संसदबाट संविधानसभाको म्याद ६ महिना थपिनेछ । दलहरुबीच अविलम्ब राष्ट्रिय सरकार गठन गर्ने पनि सहमति भएको छ । ६ बुदे सहमतिमा राज्यपुनर्संरचना बारेको प्रतिवेदन पाएको दुईमहिनामा काम सक्ने पनि सहमति भएको छ ।