माझी जातिहरु कोशी पूजामा व्यस्त

 लोकहरी आचार्य,सिन्धुली,फागुन १६

माझी जातिहरुले आज आफ्नो परम्परागत कोशी पूजा मनाइरहेका छन् । सिन्धुली लगायत देशभरमा छरिएर रहेका माझी जातिहरुले आज विभिन्न खोला किनारहरुमा कोशी पूजा गरिरहेका छन् । सिन्धुलीको मरिण खोला, कमला नदी, सुनकोशी, तामाकोशी लगायतका नदीहरुमा उनीहरुले पूजा गरेका हुन् । उनीहरुले नदी किनारामा बोका, हाँस, कुखुरा, राँगा लगायतको बली समेत दिने गरेका छन् । 

सिन्धुलीको मरिण खोला किनारमा विभिन्न गाउँका माझी समुदायका मानिसहरुले पूजा गरेको माझी उत्थान संघ सिन्धुलीका अध्यक्ष शुक्रबहादुर माझीले बताउनु भयो । उनीहरुले पानीको पूजा गर्ने, पानीले शक्ति दिने मान्यता उनीहरुमा रहेको छ । सिन्धुली लगायत रामेछाप, सर्लाही, महोत्तरी, धनुषा, काभ्रे, उदयपुर लगायतका जिल्लाहरुमा माझीहरुको बाहुल्यता रहेको छ ।