दलहरुबीच सत्यनिरुपण तथा मेलमिलाप आयोग गठन बारे छलफल

काठमाण्डौ,फागुन २१

प्रमुख दलहरुबीच सत्यनिरुपण तथा मेलमिलाप आयोग गठनको बारेमा आजदेखि छलफल सुरु भएको छ । शान्ति प्रक्रिया र संविधान निर्माणको बारेमा ठोस सहमति गर्ने प्रयासस्वरुप आज बिहान बसेको प्रमुख तीन दलको बैठकमा सत्यनिरुपण तथा मेलमिलाप आयोग, बेपत्ता छानविन लगायतका आयोगहरु गठनको बारेमा छलफल भएको हो । एमाले अध्यक्ष झलनाथ खनाल निवास डल्लुमा भएको छलफलमा तीनै पार्टीका शीर्ष नेताहरुले द्वन्द्व पीडितहरुको माग सम्बोधन हुनेगरी आयोगहरु गठनको बारेमा आआफ्नो धारणा राखेका थिए । तीन दलको अर्को बैठक आगामी २५ गते बस्ने छ । शान्ति प्रक्रिया र संविधान निर्माणको बारेमा आज सामान्य छलफल मात्र भएको एक नेताले जानकारी दिए ।

 एकीकृत नेकपा माओवादी, नेपाली काङ्ग्रेस र नेकपा एमालेका शीर्ष नेताहरूको हिजो बसेको बैठकमा माओवादीले आफ्ना लडाकुहरुलाई महानिर्देशनालयमा उचित पद दिनुपर्ने प्रस्ताव गरेपछि बैठक विनानिष्कर्ष सकिएको थियो । ७ बुँदे सहमति अनुसारनै शान्ति र संविधानको बाँकी काम पूरा गर्न माओवादीले प्रतिबद्वता जनाए पनि पछिल्लो समयमा राजनीतिक तहमा निर्णय गराएर भए पनि हानिर्देशनालयमा माओवादीले ठूलो पद खोजेर समस्या खडा गरेको काङ्ग्रेस र एमालेको भनाइछ ।

 फागुन १२ गते बसेको शीर्ष नेताको बैठकले शान्तिप्रक्रिया र सेना समायोजनसम्बन्धी विवादमा सहमतिको खाका ल्याउने जिम्मा माओवादी अध्यक्ष प्रचण्डलाई दिएको थियो । विगतका सम्झौताअनुसार आयोगहरू गठनको प्रक्रिया र आगामी कार्ययोजनाको बारेमा प्रस्ताव तयार पार्न काङ्ग्रेस सभापति सुशील कोइराला र संविधान लेखनका विवादित विषयमा सहमति खोज्नेबारेको खाका प्रस्तुत गर्ने जिम्मा बैठकले एमाले बरिष्ठ नेता माधव नेपाललाई दिएको थियो ।