एकल जातीय पहिचान चाहिन्छ :महासङ्घ

काठमाडौँ, जेठ  १ । एकल जातीय पहिचानका आधारमा राज्यको पुनःसंरचना हुनुपर्ने मागसहित आदिवासी जनजाति महासङ्घले आज नेकपा (एमाले)का अध्यक्ष झलनाथ खनाललाई भेटी ध्यानाकर्षण गराएको छ । 

महासङ्घलगायत विभिन्न जातीय सङ्गठनका अध्यक्ष तथा पदाधिकारीहरुको एक समूहले आदिवासी जनजातिहरुको मागलाई संविधानमा समावेश गराउन एमालेका अध्यक्ष खनालको ध्यानाकर्षण गराएको महासङ्घका महासचिव आङकाजी शेर्पाले बताउनुभयो ।

सो अवसरमा अध्यक्ष खनालले आदिवासी जनजातिहरुका मागलाई जस्ताको त्यस्तै वार्ताको टेबलमा प्रस्ताव गर्ने प्रतिबद्धता व्यक्ति गर्नुभएको महासचिव शेर्पाले उल्लेख गर्नुभयो ।  अध्यक्ष खनालले आफ्नो पार्टी पहिलेदेखि उत्पीडित तथा जनजातिको पक्षमा आवाज उठाउँदै आएको र यस विषयमा संवेदनशील भएर लाग्ने प्रतिबद्धता व्यक्त गर्नुभएको नेवाः देय दबूका अध्यक्ष नरेश ताम्राकार बताउनुभयो ।  भेटमा नेवार, राई, लिम्बु, तामाङ, मगर, थारु, गुरुङ, सुनुवारलगायत जातिका प्रतिनिधिहरुको सहभागिता थियो ।