संविधान नबनेपछि दुइवर्षदेखि पालेको दारी र कपाल काटीयो

अनु खनाल,बर्दिबास,जेठ २० । 

संविधान निर्माणमा दवाव दिने उद्देश्यले दारी र कपाल पाल्दापनि संविधान नवनेपछि गौरीबासका एक वृद्धले आज कपाल र दारी काटेका छन् । गौरीबास ३ पाटु घरभएका ६७ वर्षिय यमबहादुर बुढाथोकीले आज पत्रकार सम्मेलन गरी आफ्नै घरमा दारी र कपाल काटेका हुन् । संविधान निर्माणकै लागि दवाव दिन बुढाथोकीले यसअघि २०६८ चैत्र ३ गतेका दिन टुंडिखेलमा ६०१ सभासदको  ग्रहशान्ति समेत गरेका थिए ।

ग्रह दशा विग्रीयो भनेपनि सँधै झगडामात्र हुन्छ भन्ने हिन्दु धर्मको मान्यता भएकोले सभासदबीच सहमति र मेलमिलाप बढाएर संविधान निर्माण गरुन भन्दै ग्रहशान्ति गरेको बुढाथोकीले बताउनु भएको थियो । त्यस्तै बुढाथोकी २०६७ साल माघ ९ गतेदेखि सिंगै नेपालको यात्रामा निस्किनु भएको थियो ।  त्यसै समयदेखि अन्न त्याग गर्नु भएका बुढाथोकीले दलहरुले संविधान सभाको एकवर्षे कार्यकाल थपेपछि २०६८ साल असोज १७ गतेका दिन अन्न ग्रहण गर्नुभएको थियो ।