एकीकृत माओवादी पदाधिकारी बैठक आज बस्ने

काठमाण्डौ,भदौ ९ । 

आगामी महाधिवेशन तयारीलगायतका विषयमा छलफल गर्न एकीकृत नेकपा माओवादी पदाधिकारी बैठक आज पनि बस्दै छ । महाधिवेशनका तयारीका विषयमा थप तयारी गर्न बैठक दिउँसो १ बजे पार्टी केन्द्रीय कार्यालय पेरिसडाँडामा बस्न लागेको प्रवक्ता अग्नि सापकोटाले सीआईएनलाई जानकारी दिनुभयो । यसअघि अस्ति बसेको बैठकले महाधिवेशनका तयारीका लागि विभिन्न पाँच वटा समिति बनाउने निर्णय गरेको थियो । एकीकृत माओवादी पार्टीको महाधिवेशन आउने माघ १४ देखि राजधानीमा गर्ने निर्णय भइसकेको छ ।

यसैबीच मधेस ब्यूरोको बैठक भने अहिले केहीबेरमा बस्ने प्रवक्ता सापकोटाले बताउनुभयो । मधेसी नेताहरूले पार्टीको महाधिवेशन आयोजक समितिमा आफ्नो समुदायको उचित प्रतिनिधित्व नभएको भन्दै बैठक नबस्ने अडान लिएपछि ब्युरोको बैठक पटक पटक स्थगित हुँदै आएको छ । यसैगरी मधेस ब्युरो अन्तर्गतका जिल्लाका मधेसी समुदायको इन्चार्ज बनाउनुपर्ने, भाषिक अधिकारका प्रदेश खारेज गरी मधेस प्रदेश बनाउनुलगायतका मागहरू पनि मधेसी नेताहरूले पार्टीमा राख्दै आएका छन् ।  मधेसी नेताहरूको अडानका कारण हिजो पनि बोलाइएको बैठक प्रभावित भएको थियो । आजको बैठकमा मधेसी समुदायको मागका सम्बन्धमा नेताहरूले संबोधन गर्ने एकीकृत माओवादीले जनाएको छ ।