दस जुवाडे पक्राउ

रौतहत, कात्तिक २ । 

रौतहट जिल्लाको गरुडा बैरीयाबाट प्रहरीले जुवा खेलीरहेका दस जनालाई खालबाटै पक्राउ गरेको छ । स्थानीय गरुडा बैरीया–६ स्थित बिरा साहको घरमा बुधबार राति ११ बजे छापा मारेर गरुडा प्रहरीले तास, कौडा तथा नगद बरामद गरेको जनाएको छ ।

पक्राउ पर्नेमा जनकपुरका फेकन चौधरी, पर्साका पवन पासवान, रौतहटका शेख लालबाबु, इदरिस मियाँ, बिजय चौधरी, राम सोगारथ पासवान, शेख सलाहुदिन, जमदार साह, सुरेश यादव र शेख इसराफूल रहेका छन् ।

 उनीहरुको साथबाट प्रहरीले पैतालीस हजार नगद, ६ थान मोबाइल सेट, तास तथा कौडा खेलाउने सामान बरामद गरेको छ । दसैं र तिहार नजिकिदै जाँदा रौतहटमा व्यवसायिक रुपमा जुवा तास खेलाउने क्रम बढे पछि नियन्त्रण गर्न प्रहरीले छापा मारेको जनाएको छ ।