सहमतिको सम्भावना झन कमजोर बन्दै

काठमाण्डौ,माघ ३ ।
राष्ट्रपतिले समयसीमा नतोकी सहमतिको सरकार गठन गर्न आह्वान गरेपछि दलहरुबीच सहमतिको सम्भावना झन टाढा धकेलीएको छ । विपक्षी दलहरुले सरकार विरुद्ध आन्दोलनको घोषणा थरेपछि सत्तासिन दलहरुपनि बलियो बन्ने रणनीतिमा लागेका छन् । दलका नेताहरुले नै सहमतिको सम्भावना नरहेको बताउन थालेका छन् । एकीकृत नेकपा माओवादीका प्रवक्ता अग्निप्रसाद सापकोटाले विपक्षी दलहरुका कारण सहमतिको सम्भावना सकिएको बताउनुभयो । सोपकोटाले अब विपक्षीदल आन्दोलनमा गए सरकारले पनि आफ्नो रणनीति अपनाउने   बताउनुभयो ।

 उहाँले भोलि संघिय लोकतान्त्रिक गणतान्त्रिक गठबन्धको सचिवालयको बैठक बसेर रणनीति बनाउने जानकारी दिनुभयो ।  विपक्षी दलहरुले भने एकीकृत माओवादीका कारण नै सहमतिको सम्भावना सकिएको प्रतिक्रिया दिएका छन् । नेकपा एमालेका सचिव युवराज ज्ञवालीले एकीकृत माओवादी प्रधानमन्त्रीको कुर्सी जोगाउने रणनीतिमा लागेको कारण नै समस्या जटिल बनेको बताउनुभयो । विपक्षी दलहरुले अब आन्दोलनको बलबाट नै सरकार परिवर्तन गर्ने पनि दावी गर्नुभयो । सत्तासिन दलहरु सरकार सत्ता टिकाउने र विपक्षी दल सत्ता गिराउने रणनीतिबाट अघि बढ्ने देखिएको छ ।