सरकारले निर्वाचन गराउन सक्दैन : राणा

नविनबाबु अधिकारी,
सिन्धुली,माघ ११ ।
प्रधानमन्त्री डा. बाबुराम भट्टराईको सरकारले जेठमा संविधानसभाको निर्वाचन गर्न नसक्ने राष्ट्रिय प्रजातन्त्र पार्टीका अध्यक्ष पशुपति शमशेर राणाले बताउनुभएको छ । राष्ट्रिय प्रजातन्त्र पार्टी र जनशक्ति पार्टी एकताको प्रथम जिल्ला अधिवेशन उद्घाटन गर्दै राणाले यस्तो बताउनुभएको हो । प्रधानमन्त्री भट्टरार्ईले तत्काल राजिनामा दिनुपर्ने बताउँदै राणाले सरकारमा बसिरहनु कुनै औचित्य नभएको बताउनुभयो । 

राणाले अहिलेको सरकारले महङ्गी नियन्त्रण गर्नुको सट्टा उल्टै महङ्गीको नेतृत्व गरेको आरोपसमेत लगाउनु भएको छ । घुसखोरी, भ्रष्टाचारी र हत्यारालाई सरकारले समर्थन गरेकाले अहिले प्रधानमन्त्रीकै कारण जनता असुरक्षित रहेको उहाँले बताउनुभयो ।
यसैबीच अखिल नेपाल राष्ट्रिय सवतन्त्र विद्यार्थी युनियन र नेपाल विद्यार्थी संघ सिन्धुलीको संयुक्त आयोजनामा जिल्ला प्रशासन कार्यालय सिन्धुली अगाडि धर्ना दिएका छन् । दुई विद्यार्थी संगठनको अगुवाइमा भएको धर्नालाई नेपाल पत्रकार महासंघ सिन्धुलीले पनि ऐक्यबद्धता जनाएको छ ।