गुँरास फुल बेचेर पढाई खर्च

रमा कार्की,

सिन्धुली,फागुन १९ ।
सिन्धुलीको रतनचुरा गाविसमा पर्ने खनियाँखर्कका बालाबालिकाहरुलाई आज भोली गुँरासको फुल बेच्न भ्याइ नभ्याइ छ । यसो हेर्दा कुनै शुभकार्यमा स्वागतका निम्ति हात भरी गुराँसको फुलका गुच्छा बोकेर अतिथीलाई पर्खेर बसेका जस्ता देखिने ती बालबालिकाहरुको दृश्य स्वागत  मात्र  नभएर व्यापारका निम्ति पनि हो । अहिले सिन्धुलीको महाभात क्षेत्र गुँरासले बेहुली जस्तै सिंगारिएको छ ।  सिन्धुली बनेपाको बाटो हुँदै दिनहुँ  आवतजावत गर्ने र अन्य छोटो दुरीमा यात्रा गर्ने यात्रुहरुको पर्खाइमा बसेका बालबालिकाहरु तछाडमछाड गर्दै फुल बेच्न तत्लिन छन् । त्यहाँका बालबालिकाहरु  ए सस्तो सस्तो दशै रुपैयाँ दसै रुपैयाँ भन्दै गुरासको फुल   बेचिरहेका भेटिन्छन् ।

गुराँस टिप्न बालबालिकाहरु आफैँ जंगल जान्छन् ।  कुनै दश रुपैयाँ त कुनै बीस रुपैयाँको गुच्छा बनाउँदै विक्रीका लागि यात्रुको प्रतिक्षामा हुन्छन् । गुराँसको फूल बेचेर दिनहुँ ५० रुपैयाँ सम्म पैसा कमाउने र पढाईका लागि खर्च पुराउने बालक खिलबहादुर थापा मगर वताउनुहुन्छ । 
स्कुलको समय भन्दा वाहेक गुराँसको फूल वेच्नु उनिहरुको दैनिकी नै वनेको छ । आफूसंग भएको फुल सबै यात्रुहरुले नकिन्ने र सबैले किनिदिए एकै दिनमा धेरै पैसा हुने अर्का बालक सन्जिव तामाङ्को भन्नुहुन्छ ।   फागुन, चैत्र र वैशाख गरी तीन महिनासम्म फुल्ने गुराँसले सवैको मन त लोभ्याएकै छ स्थानिय बालकालिकालाई समेत पढाई खर्च जुटाउने माध्यम बनेको छ ।