‘गल्ती भयो माफ गर्नुस्’:सुशील कोइराला

काठमाडौं,  वैशाख २७ । 

कांग्रेसका सभापति सुशील कोइरालाले पूर्वमुख्य सचिव लोकमानसिंह कार्कीलाई अख्तियार प्रमुख बनाउने निर्णय गलत भएको स्वीकार्दै माफी मागेका छन् । वीपी चिन्तन प्रतिष्ठानले शुक्रबार कीर्तिपुरमा आयोजना गरेको कार्यक्रममा सभापति कोइरालाले विवादित छविका कार्कीलार्ई अख्तियार प्रमुखमा सिफारिस गर्दा आफू चुकेको उल्लेख गरे ।

‘हामी चुकेकैं हौं, सभापति कोइरालाले,’ भने, ‘हामीबाट गल्ती भयो माफ गर्नुस् ।’ उनले कार्की प्रकरणबाट नेतृत्वले पाठ सिकेको बताए । ‘आगामी दिनमा यस्ता त्रुटीहरु दोहोरिने छैन,’ उनले भने । उनले आगामी संविधानसभा निर्वाचनमा पार्टीलाई विजय बनाउन कार्यकर्तालाई निर्देशन समेत दिए । चार दलीय संयन्त्रबाट कार्कीलाई अख्तियार दुरुपयोग अनुसन्धान आयोगको प्रमुखमा नियुक्तिका लागि सिफारिस गरेपछि अहिले पार्टीभित्रैबाट उनको आलोचना भईरहेको छ ।