एकै जिल्लामा एचआईभी संक्रमितको सङ्ख्या १३ सय, पुरुषभन्दा महिला बढी

अछाम,जेठ २२ ।

अछाम जिल्लामा १३ सय २६ जना एचआईभी संक्रमित रहेका बताइएको छ । जिल्ला एड्स समन्वय समितिले सार्वजनिक गरेको बैशाख महिना सम्मको तथ्यांक अनुसार जिल्लाका विभिन्न स्थान तथा स्वास्थ्य संस्थामा ५७ हजारको रगत जाँच गरिएको थियो । यसमध्ये पुरुषभन्दा महिलाको सङ्ख्या बढी छ । ५ सय २१ जना पुरुष संक्रमित रहेको अछाममा महिलाको संख्या भने २ सय ८४ ले बढी छ ।

एचआइृभी संक्रमित महिलाको संख्या ८ सय ५ जना रहेको जिल्ला एड्स समन्वय समितिका संयोजक मोहन खड्काले बताउनु भयो । एचआईभी संक्रमित मध्ये ९८ जना बालबालिका रहेका छन् । जसमा ५९ जना बालक र ३९ जना बालिका रहेका बताईएको छ । अछाम जिल्लामा एआरटी औषधि सेवन गर्ने ५ सय ११ मध्ये २ सय ३६ जनाले नियमित औषधि सेवन गरीरहेका र अरुले बाहिर जिल्लाबाट पनि एआरटी खाने गरेका बताईएको छ । रोजगारीको लागि भारत जाने र त्याहाँ असुरक्षित व्यवहार गर्ने मुख्य कारणले गर्दा अछाम एचआईभीको उच्च जोखिममा रहेको छ ।