सिन्धुलीको लागी छुटेको बस लुटियो

गीता चिमोरिया, महोत्तरी, पुस ३० ।  

महोत्तरीमा आज बिहान एउटा यात्रु बसमा लुटपाट भएको छ । काठमाडौंबाट सिन्धुलीको लागि छुटेको ना ४ ख १५०१ नम्बरको बसलाई नियन्त्रणमा लिएर लुटेराहरुले यात्रुहरुबाट नगद, सुनचाँदीका गहना, मोवाइल लगायतका सरसामान गरी करिब पाँच लाख रुपैयाँ मूल्य बराबरको धनमाल लुटेका हुन् ।

 कटुवा पेस्तोल र खुकुरी सहितका ९ जना लुटेराहरुले बसका चालकलाई नियन्त्रणमा लिएर आफैंले गाडी चलाई लुटपाट गरेको इलाका प्रहरी कार्यालय बर्दिवासका प्रहरी निरीक्षक अशोक झाले जानकारी दिनुभयो । लुटेराहरुले एक लाख रुपैयाँभन्दा धेरै नगद, ६ तोला भन्दा धेरै सुनका गहना, मोवाइललगायतका सरसामान लुटेका हुन् । 

काठमाडौंको कलंकीबाट यात्रु बनेर चढेका ४ जना र हेटौंडाबाट चढेका ५ जना गरी नौ जना लुटेराले बिहान ४ बजे सर्लाहीको फुलजोर जंगलमा बस प्रवेश गर्नासाथ लुटपाट शुरु गरेको यात्रुहरुले बताएका छन् । गुडिरहेको बस भित्र हतियार देखाएर महोत्तरी खयरमारा घर भएका बसचालक कृष्णकुमार श्रेष्ठलाई कुटपिट गर्दै नियन्त्रणमा लिएपछि लुटेरा मध्येको एक जनाले बस चलाएको र बाँकी ८ जनाले लुटपाट गरेको प्रहरीले जनाएको छ । 

कुटपिटबाट घाइते भएका बस चालकको बर्दिवासमा उपचार भैरहेको छ । लुटपाटपछि महोत्तरीको बर्दिबास नजिक बिश्वकर्मा चोकमा गाडी रोकेर उनीहरु जंगलतिर भागेका प्रहरी निरिक्षक झाले बताउनु भयो । लुटेराहरुले २० किलोमिटर जंगल क्षेत्रमा आफैंले गाडी गुडाएर लुटपाट गरेका हुन् । प्रहरीले विश्वकर्मा चोक नजिकबाट शंकाको आधारमा एक जनालाई मोटरसाईकलसहित नियन्त्रणमा लिइएको जनाएको छ ।