खुर्कोटमा बेलुकी बस सुचारु गर्न सभासद्को माग

रासस,काठमाडौँ, फागुन २३ । काठमाडौँबाट विपी राजमार्ग भएर बनेपा–बर्दिबास हुँदै पूर्वी नेपालका जिल्लाहरुमा जान चाहने यात्रुलाई सिन्धुलीको खुर्कोटमा रहेको इलाका प्रहरी कार्यालयले बेलुकी ८ बजेपछि जान नदिँदा हजारौँ यात्रु मर्कामा पर्ने गरेका छन् । 

ओखलढुङ्गाबाट निर्वाचित नेपाली काँग्रेसका सभासद् रामहरि खतिवडाले आज विज्ञप्ति जारी गर्दै प्रहरीले रोक्दा दैनिक हजारौँ यात्रु समस्यामा परेकाले तत्काल यो व्यवस्था हटाउन सम्बन्धित पक्षसँग माग गरेका हुन् ।  

निर्माण कार्य भइरहेका बेला यातायातका सवारी साधन चलाउन दिएर एकै घटनामा ४७ जनाको निधन भएको थियो । “एक महिनाअघि विपी राजमार्ग निर्माण कार्य सम्पन्न भएपछि दुर्घटनाको कुनै समस्या नभएकाले खुर्कोटमा बेलुकी ८ बजे पूर्व जाने यात्रीलाई रोक्ने परिपाटी हटाउनुपर्छ”– सभासद् खतिवडाले भने ।  

पूर्वका ओखलढुङ्गा, सोलुखुम्बु, सिन्धुलीलगायत विराटनगर र जनकपुर क्षेत्रमा चल्ने साना सवारी साधनसमेत विपी राजमार्ग भएर चल्ने भएकाले यो राजमार्ग राति चल्न दिनुपर्ने माग पनि सभासद् खतिवडाले गरेका छन् ।