दोलखाका विभिन्न गाविसले निर्देशिका पालना गरेनन्

शेरबहादुर भुजेल,  दोलखा, पुस १४ 

दोलखाका विभिन्न गाविसहरुमा प्राप्त भएको स्थानीय शासन तथा सामुदायिक विकास कार्यक्रम वापतको थप अनुदान रकम निर्देशिका विपरित खर्च भएको पाइएको छ । असल शासन परियोजना दोलखाले जिल्लाका विभिन्न गाविसमा आयोजना गरेको स्थानीय शासन तथा सामुदायिक विकास कार्यक्रमबाट साचालित योजनाको गुणस्तर सम्बन्धि छलफल कार्यक्रममा तथ्य सार्वजनिक भएको हो । असल शासन कार्यक्रममले जिल्लाको लामीडाँडा झ्याँकु पवटी भिरकोट र मालु गाविसमा आयोजना गरेका छलफलमा सहभागी राजनीतिक दलका प्रतिनिधिहरुले स्थानीय गाविसहरुमा वजेट कम भएको र माग वढी आउँने भएकाले निर्देशिका पालना गर्न नसकिएको स्वीकार गरेका थिए ।

 मालु गाविसमा स्थानीय शासन तथा सामुदायिक विकास कार्यक्रम अन्र्तगतको बजेट दलित जनजाति र महिलाका लागि विनियोजन नगरी स्वास्थ्य केन्द्रको भवन मर्मतमा खर्च गरिएको छ भने पवटी गाविसमा वडा स्तरमा दामसाहीले भागवण्डा गरिएको थियो । त्यस्तै भिरकोट गाविसमा स्थानीय शासन तथा सामुदायिक विकास कार्यक्रम अन्र्तगत साचालित योजनाको लागि छुट्टै उपभोक्ता समिति गठन नगरी रकम खर्च गरिएको पाइएको थियो । 

त्यस्तै लामीडाँडा गाविसमा जिल्ला तहबाट जाने प्राविधिकहरुले उपभोक्ता समितिका पदाधिकारी र सदस्यहरुलाई अनावश्यक रुपमा दुःख दिने गरेकाले निर्देशिका पालना गर्न नसकिएको स्थानीय राजनीतिक दलका प्रतिनिधिहरुले गुनासो गरेका थिए । विकास निर्माणको साथै स्थानीय शासन तथा सामुदायिक विकास कार्यक्रमको प्रभावकारी ढंगले साचालन हुन नसक्नुमा जिल्ला विकास समिति र गाविसहरुको साथै प्राविधिकहरुको पनि कमजोरी भएको स्थानीय सरोकारवालाहरुले बताएका छन् ।