श्रीमतीको रिसले आफ्नै घरमा आगजनी

खोटाङ, वैशाख १७।

श्रीमतीसँग घरायसी झगडा परेपछि रिसको झोँकमा आफ्नै घरमा आगो लगाउँदा खोटाङ डिकुवा-३ का रामबहादुर मगरको परिवार बिचल्लीमा परेका छन् । मादक पदार्थ सेवन गरी श्रीमतीसँग झगडा गर्दै  पाँच दिनअघि घरमा आगो लगाएका मगरको नौजनाको परिवार अहिले बिचल्लीमा परेका हुन् । घरमा भएका भाँडाकुँडा, लत्ताकपडा, अन्नपात सबै जलेर नष्ट भएपछि मगर परिवार भाइको घरमा शरण लिएर बसेको स्थानीयवासी रेवतबहादुर मगरले जानकारी दिनुभयो ।