एकीकृत माओवादीले विस्तारित बैठकको निर्णय सार्वजनिक गर्ने

काठमाण्डौ,साउन ७ । 

एकीकृत माओवादीले पार्टीको सातौं विस्तारित बैठकका निर्णय आज सार्वजनिक गर्ने भएको छ । विस्तारित बैठकका निर्णय सार्वजनिक गर्न एमाओवादीले आज दिउँसो तीन बजे पत्रकार सम्मेलन गर्दैछ । यही साउन २ गतेदेखि राजधानीको भृकुटीमण्डपमा सुरु भएको साताँै विस्तारित बैठक हिजो ११ बुँदे समसामयिक र राजनीतिक प्रस्ताव पारित गर्दै सम्पन्न भएको थियो । पारित प्रस्तावअनुसार आगामी माघ महिनामा महाधिवेशनको आयोजना गर्ने र विद्यमान केन्द्रीय समिति, पोलिटव्यूरो, स्थायी समितिलगायत पार्टीका सबै समिति विघटन गर्दै महाधिवेशन आयोजन समितिमा रूपान्तरण गर्ने निर्णय भएको छ । 

आजदेखि लागू हुने गरी अध्यक्ष पुष्पकमल दाहालको सचिवालयमा रहेका सम्पूर्ण सदस्यहरू प्रधानमन्त्री डा बाबुराम भट्टराईको सचिवालयमा र उपाध्यक्षसमेत रहनुभएका डा भट्टराईको सचिवालयमा रहेका सदस्य अध्यक्ष दाहालको सचिवालयमा सरुवा गर्ने निर्णय पनि भएको छ । पार्टीको आर्थिक हिसाब किताव चुस्तदुरुस्त राख्न पार्टी केन्द्रीय कार्यालयमा लेखा आयोग गठन गर्ने, पार्टी नेताका सबै भौतिक सम्पत्ति पार्टी केन्द्रलाई बुझाउने र आवश्यक पर्ने सरसामान संस्थागतरूपमा लिने र उचित लेखापरीक्षण राख्ने निर्णय पनि गरिएको छ ।