उन्नाईस यात्रुको मृत्यु

सीता एयरको विमान दुर्घटना

काठमाडौं,  असोज १२ । भक्तपुरको मनहरा खोला सुकुम्वासी वस्ती नजिकै सीता एयरको डोनियर जहाज आज दुर्घटना हुँदा १९ जनाको मृत्यु भएको छ । वस्ती नजिकै दुर्घटना भएको विमान उडान भरेको केही मिनटमै दुर्घटना भएको हो । सोलुखुम्बुको लुक्ला तर्फ यात्रु लिएर विहान ६ बजेर १५ मिनटमा उडेको विमानमा समस्या आएपछि सुरक्षित अवतरका लागि विमानस्थल तर्फ फर्केको थियो ।

जहाज विमानस्थल नपुग्दै करिव ६ बजेर १९ मिनटमा सुकुम्वासी वस्ती नजिक खसेको प्रत्यक्षदर्शीले जनाएका छन् । विमानमा आगलागी भएपछि चालक दलले आकस्मीक अवतरण गरेको अनुमान प्रत्यक्षदर्शीको छ ।

तस्विर:फेसवुक 

जहाज दुर्घटनामा जलेर चालक दलका तीन सहित १९ जनाको मृत्यु भएको प्रहरी भनाई छ । मृत्यु हुनेमा विमानका चालक विजय तण्डुकार, सहचालक टी. थापा र परिचारिका रोजा शाक्य रहेका छन् । मृत्यु हुनेमा अधिकांश विदेशी यात्रु रहेका छन् । मृत्यु हुनेहरुका बारेमा सीता एयरले केही बताएको छैन । उद्धार गरिएका टुक्राटुक्रा परेका शवलाई पोष्टमार्टमका लागि शिक्षण अस्पताल महाराजगञ्ज लगिएको छ ।

दस बर्ष अघि पनि मनोहरा खोला नजिकै आजकै प्रकृति अनुसार विमान दुर्घटना भएको थियो । योसँगै डोनियर विमानको जहाज नेपाली आकाशमा छैटौं जाहाज दुर्घटना हो ।