जवान हुन मन छ ? माछाको तेल प्रयोग गर्नुस्

एक नयाँ अध्ययनले नियमित व्यायाम सँगै माछाको तेल नियमित सेवन गर्ने मानिसमा बुढ्यौलीको समस्या छिटो नदेखिने तथ्य पत्ता लगाएको छ ।
माछाको तेलमा पाइने खास तत्वले शरीरका मांशपेशीलाई तन्दुरुस्त बनाउने र यसो हुँदा पाको उमेरमा समेत मानिस तन्दुरुस्त तथा जवान देखिने शोधकर्ताहरूको भनाइ छ । माछाको तेलमा पाइने ओमेगा थ्री फ्याट्टी अम्ल बुढोपना रोक्नमा कामयावी हुने बताइएको छ । जैतुनको तेलको प्रयोग गर्नेमा भन्दा माछाको तेल प्रयोग गर्ने मानिसको मांशपेशी बढि मजबुत पाइएको छ । यो शोध अपेक्षकृत रूपमा कम मानिसमा गरिएको र यसलाई अझै पुष्टि गर्न अझै धेरै जनसंख्यामा परीक्षण गर्ने योजना शोधकर्ताहरूको छ ।

बेलायतको एबरडिन विश्वविद्यालयका शोधकर्ताहरूले गरेको यो शोधअनुसार माछाको तेल नियमित सेवन गर्ने मानिसमा हृदयाघातको खतरा पनि कम हुन्छ । उमेर बढेसँगै मानिसको मांशपेशी कमजोर बन्ने तथा तन्तुहरू नष्ट हुने समस्या देखा पर्छ, यसलाई सार्कोपेनिया भनिन्छ । खासगरी ५० वर्ष कटेपछि महिला तथा पुरुषमा यस्ता समस्या देखापर्छन् । तर, माछाको तेलको नियमित सेवन गर्नाले मांशपेशीलाई दह्रो पार्दै  बुढ्यौलीका लक्षण  देखिने समस्यालाई दूर गर्ने शोधकर्ताहरू बताउँछन् ।