‘जतिसक्दो चाँडो संविधान जारी गर्नुपर्ने’

लुम्बिनी, फागुन १० । मन्त्रिपरिषद्का पूर्वअध्यक्ष खिलराज रेग्मीले जतिसक्दो चाँडो संविधान जारी गर्नुपर्ने बताएका छन् ।  

आम नागरिकको चाहना शान्ति र संविधान भएकाले अब ढिला नगरी संविधान जारी गर्नुपर्नेमा उनले जोड दिए । 

भैरहवास्थित गौतमबुद्ध विमानस्थलमा आज दिउँसो पत्रकारसँग कुरा गर्दै उहाँले संविधान नबन्दासम्म मुलुकमा समृद्धि र विकास सम्भव नभएकाले संविधान निमार्णमा जुट्न सबैलाई आग्रह गरे ।  

पूर्व अध्यक्ष रेग्मीले तत्कालीन असजिलो समयमा पनि तोकिएको समयभित्रै संविधानसभाको निर्वाचन गराउने अभिभारा पूरा गरेको बताउँदै दलहरुले समयमा संविधान दिन नसके जनतालाई चित्तबुझ्दो जवाफ दिनु पर्दछ भने । रासस